الثلاثاء، 6 يناير 2009

فعلا happy new year !!

كثيرة هي المواقف التي نشعر فيها بالملل .. وكثيرة هي الأوقات التي لا ندري كيف نقضيها ..
الشعور بالحبس لمن لم يجربه ( يعني الكلام ما يشمل خريجين السجون ;p ) قاس لا يطاق تحمله لأي كان ..
ما جعلني أسطر هذه المقدمة هو ما حدث معي في سفرتي الأخيرة إلى الشقيقة قطر .. حيث طارت رحلتي - غير الموفقة - في تمام الخامسة والنصف فجرا .. يوم 1 يناير الماضي ..
كل شيء كان يسير حسب الأصول إلى ان وصلنا مطار الدوحة الدولي .. أو بالأحرى في سماء الدوحة فوق المطار .. وذلك عندما اخبرنا قائد الطائرة أن مسارها سيتغير إلى الدمام ما لم يزل الضباب خلال الدقائق القليلة المقبلة !!
لا أدري هل بفعل السهر أو غيره فإنني تخيلته يمزح .. come onnnn .. من الدوحة إلى الدمام .. بجوارك دبي ;p او على الأقل البحرين محروسة في العين ;) إلا انه جدد بعد بضع دقائق قوله " سنتجه إلى الدمام " !!
وصلنا إلى الدمام بعد حوالي نصف ساعة ( لو مكمل راد كويت جان ابرك !! ) وانتظرت دقائق حتى ينزلونا من الطائرة ..
الدقائق صارت عشرات .. ثم مئات !!
بقينا محبوسين في الطائرة قرابة 7 ساعات !!
الكابتن أجنبي محترم .. ينتظر أولا تزويده بالوقود .. ثم دوره في الإقلاع والعودة إلى الدوحة .. التحلطم يسود الطائرة .. لو كان قائدها عربيا لـ " لف مخهم " بكلمتين وطار بعد صفاء الجو مباشرة !!
ورغم أني فرحت في البداية لخبر التأخير .. لكوني كنت أشاهد فيلم " meet dave " لإيدي ميرفي .. وبالتالي سأتمكن من استكماله .. إلا أن السحر انقلب علي وتورطت !!
لم أجد وسيلة لقتل الوقت سوى ما فعلته ابنتنا المصونة كوثر .. والتي افترشت 3 كراسي ونامت منذ طرنا حتى وصلنا إلى الدوحة ( نوم العوافي ;p )
تسألوني لماذا لا أتسلى بكتاب رغم علاقتي الجيدة بالقراءة ؟؟
أولا لأني كنت احمل اكثر من 90 كتابا لإيصالهم لجناح دايموند بوك في معرض الدوحة للكتاب .. لكنهم للأسف جميعا في " كرتون " ذهب مع الحقائب .. ولم احتفظ باي نسخة لكون الرحلة قصيرة .. ساعة زمان ونصل !!
وثانيا أن " مخي مقفل " من السهر .. فالرحلة كما تعلمون فجرا ..
المهم أنني قررت النوم .. وبعد جهد جهيد ( لاعب كرة مو نايم ههه ) تمكنت من النوم لساعة .. فأيقظني ضحك مجموعة من الشباب الذين حضروا مثلي إلى الجزء الأخير من الطائرة ليجدوا فراشا مناسبا ..
أيقظوني وحقدت عليهم .. ولكن ما لبثت أن " قطيت أذني " وتسليت بما حكوه من " سوالف " :)
أحد الأصدقاء القدامى كان بينهم دون ان ألحظه .. سلم علي لاحقا وأحضر كاميرا فيديو صور بها معاناتهم .. و"خذ عبط " منهم :)
إحدى المسافرات جاءت تسألني " لو سمحت إنت طالب ببريطانيا ؟ " .. أجبتها بأدب مراعاة للظروف : كلا ..
ولو لم نكن في تلك الظروف لقلت " جامعة كويت وناجح جوازا ;p " ..
أفكر في أي شيء أسلي نفسي فيه .. سألت المضيف هل تودون مساعدة في " غسيل المواعين " ؟ ولا ادري لماذا ابتسم !! ;p
نوم .. " قز" في أرجاء الطائرة .. ألعاب .. وغيرها مما شغل الوقت .. حتى عدنا إلى الدوحة ظهرا منهكين .. وبالطبع طار اليوم بأكمله بعدها في النوم ..
المضيفة تقول وبكل وقاحة أثناء خروجنا Happy new year !!
واضح جدا .. إذا كان هذا أولها .. فالله يستر من " تاليها " !
___
النائب الفاضل أحمد المليفي أعلن قبل قليل انه يفكر جديا في توجيه استجواب لرئيبس الوزراء لأن الحكومة لا تحضر جلسات مجلس الأمة ..
لا تعليق عندي .. ماذا عنكم ؟ :)

هناك 72 تعليقًا:

بو محمد يقول...

ما قلت لنا
على أي خطوط كنتوا؟
الطائر المينون ؟؟؟
و بالنسبة للأستجوابات فأقول
خل يستجوبون، المجلس هذا إذا طول ما يراح يطول وايد، مارس حده
موفق عزيزي

TruTh يقول...

واااي الله يعينكم والله 7 ساعات تأخير؟

شي ينرفز حيل

يلا بعد شتسوون مو مقسوم لكم تتوفقون في هذي الرحلة

خيرها بغيرها و المهم الحمدلله على سلامتكم

-mate يقول...

أكيد على الكويتية الدايخة، مو غريبة عليها

أهم شي كوثر الله يحفظها ما تعسرت عليكم واهم شي إنها اجزرت هال 7 ساعات
:)

إنزين جان قلت طالب في بريطانيا جنك ماتدري، جان ألحين رايح لندن بدال الدوحة
;q

ولا وصلت هناك، قلت كله من تأخيركم مالت عليكم وسفل فيهم، وراح يعطونك سكن وتعويض إنت والمدام وكوثر!

ههههههه

أما على طاري تصريح الحبيب، خل ينطر الحكومة إتشكل بالأول

كبرياء وردة يقول...

الحمد لله على سلامتكم

الله يعينكم صج عذاب
احلى شي لما قلت تبي تساعدهم بغسل الصحون
لا تسمعك مرتك:p

Love Moments يقول...

اول شي الحمدالله على السلامه
وثاني شي مادام اخروكم 7 ساعات ليش ما نزلتوا من الطياره !!

او ادري يا بو كوثر انه لي الحين خاطرك بالصحون jk ;p


وانشالله من بدايه هالسنه اتوقع لك سنه مليئه بالمفاجآت =)انشالله

أبو لطيف يقول...

خطاك السو

الحمد لله على السلامة

بحفظ الله

مركبنا يقول...

الحمد لله على السلامة

توقع الغير متوقع
وانت صاج لورادين الديرة احسن من الدمام ،،،


كله عشان الانسه كوثر تكمل نومتها

اما عن المليفي فهذا فلم الموسم الجيد ،، تدري 007 مو احسن منه له مليون جزء المليفي احسن
جوف عاد شنوا يعطونه ترضاوه عشان يسكت

مركبنا يقول...

صج موضوعنا لا يزال معلق عن هذيان ناطرين ردك

enter-q8 يقول...

شنو هالسنة
بس زين ما طلع لك احد و قالك
الجمله الاكثر تداولا من اي سهم ببورصة الكويت

كل تأخيره و فيها خيره

******

اما بالنسبة لموضوع بو انس
الصراحة تلومه
حكومة معلقه و مطنشه
شغل هذا مجلسكم اشبعوا فيه محنا حاضرين اللي قاعد يصير تفريغ الدستور و تعطيله
تحت ذراع حكومة مستقيله

Q8Sky يقول...

يموتون على التصريحات الثورية وإن كان معاه الميفي معاه حق

Q8EL5AIR يقول...

يالله ما اصابك لم يكن ليخطأك !!


رب ضارة نافعة :)


من كانت بدايته محرقة ... كانت نهايته مشرقة :)



مع امنياتي لك بعام جميل ومريح ومملوء بالكتب القريبة يمك :)



بالنسبة للمليفي .. فحده مووقته !!

احنا وين وهو وين !!!!




وتحياتي ..

ويسلمواااااااااااااااااااااااا :)

@alhaidar يقول...

هلا وغلا أخوي بو محمد :)

كنا على القطرية طال عمرك .. والله اهي خوش طيارة وفيها وسائل ترفيه .. رحت عليها بالصيف ماليزيا وعجبتني ..

بس المشكلة كانت بالضباب .. وكابتنا وايد مؤدب لما خف الضباب .. خبرك أجنبي :)

المجلس أوافقك إن نهايته جريبة .. وأعتقد النواب نفسهم عارفين هالشي عشان جذي كلمن يحاول يتكسب بطريقته ..

مرورك أسعدني أخوي :)

@alhaidar يقول...

TruTh :

الله يسلمج أخيتي ..

ئي والله 7 ساعات على قولة واحد معانا علطيارة لو رايحين سيدني جان وصلنا :)

بس علمونا الصبر شلون صاير ;p

أسعدني مرورك الجميل :)

@alhaidar يقول...

-mate :

لا والله يخوي هالمرة القطرية .. بس حرام محولين من مطارهم وأبوظبي والبحرين اكثر من 40 طيارة .. كلهم بسبب الضباب ..

الجرايد هني ما كتبت الموضوع ؟

اللي سألت عن بريطانيا مسكينة طالبة كويتية تدرس هناك وكانت رايحة ترانزيت قطر .. ولا لو اهم جان من امه قلت ئي دوحة لندن بلييز ;p

والحبيب شكله يدري ماكو حكومة الحل أسرع .. سبق السيف العذل ;)

@alhaidar يقول...

كبرياء وردة :

الله يسلمج اخيتي :)

لا غسيل الصحون اصلا فكرتها لأنها تدري إني خبرة بهالسالفة ;p تدرين تدريبها هههه


مرورج أثلج صدري :)

@alhaidar يقول...

violeta :

اهليين اخيتي :)

والله ليش ما نزلونا مادري عنهم !! قرار رئاسي يمكن ;p

بس بيني وبينج انا قلت هم شينزلنا شنسوي بالدمام وشيلة وحطة جناط وممكن بأي لحظة يقولون ردو ..

لو بدبي جان أصرينا ينزلونا :P

والصحون شنسوي مالنا الا صحون البيت ;p

واضح سنة مليئة بالمفاجآت .. بس عاد انشالله حلوة هههه


أسعدنس مرورك الكريم :)

@alhaidar يقول...

ابو لطيف :

خطاك اللاش اخوي ما تقصر ..

والله يسلمك ..

مرورك شرفني :)

@alhaidar يقول...

مركبنا :

الله يسلمج اخيتي :)

ئي والله اهي السفرة كلها عشان كوثروه ;p

والمليفي حاله حال باجي النواب .. اللي تكسب فيه إلعب فيه ..

ولا عزاء للكويت :(

@alhaidar يقول...

Enter-Q8 :

ههههه والله يخوي هالجملة صارت بكل أوضاع البلد مو بس البورصة ..

كل شي معطل وانا اخوك ..

وبالنسبة لأبو أنس هم وجهة نظر ونحترمها ..

ومسألة تفريغ الدستور من محتواه محد يرضاها .. بس يخوي شايف مستوى الطرح البرلماني وين وصل ؟

ضحكني أمس رجا حجيلان .. داز تصريح يطالب فيه بمتابعة وضع طالب مسوي حادث مادري بأي ديرة ..

زراس أمك ندري مهم بس ماكو أهم منه يا حجيلان ؟
:)

مرورك دائما يسعدني عزيزي :)

Sn3a يقول...

انا 7 ساعات بالجو ماتحملهم
هالمره عالارض وبالطياره ويييه زين انكم صبرتو

@alhaidar يقول...

Q8sky :

اللي تكسب فيه إلعب فيه ..

هذي السياسة يخوي ..

اسعدني مرورك :)

@alhaidar يقول...

Q8EL5AIR :

الله يسمع منك يخوي .. خوش مثل هذا من وين ؟ :))


اسعدني مرورك الكريم :)

@alhaidar يقول...

Sn3a :

والله شنسوي أخيتي ..

مجبر اخاك لا بطل :)

اسعدني مرورك الكريم :)

Fankooshy يقول...

مبين عليها خوش رحلة لوول

المليفي...استانس عالسالفة
مادري شنو مطالبة هالمرة

شكرا :)

سرحان يقول...

و الله يا بو عبدالحميد أنا أشوف غنه بو انس زودها بهالتصريحات

و بالنسبة للـ 7 ساعات.. لو انا جان ميت، ماشاء الله عليك صبور من ايام الجامعة :q و ايام "فرز الصناديق" :)

@alhaidar يقول...

fankoshy :

ئي حدها خوش رحلة هههههههه

المليفي ماكو شغلة الظاهر ;p

نائب وكيفه شنسوي روح كلم الآلاف اللي صوتوله ;)

مرورك اسعدني اخوي :)

@alhaidar يقول...

سرحان :

من ناحية زودها مو بس اهو الصراحة .. بس هذي السياسة شتسوي :)

اسم الله عليك من الموت بعد عمر طويل انشالله يخوي :)

لسة فاكر الصناديق ;p

أيام حلوة كانت والله :)

يقولون للصبر حدود بس الحمد لله انا لي الحين مو شايف حدودها عندي :)

S-Q8 يقول...

المضيفة تقول وبكل وقاحة أثناء خروجنا Happy new year !!
loool.. talk about bad mood!
yallah 7amdelah 3al salamah..
o happy new year walaw ina met2akher;)

محمد سعد القويري يقول...

الإعلامي أحمد عبدالحميد الحيدر

والله موقف لا تحسد عليه

والحمد لله مرت الأمور سليمة

وإنت - الله يهديك - نازل الدمام.. ولا عطيتنا خبر
لو كلمتنا موبايل كان قلطناك وغديناك وعشيناك
وهذه فرصة لنحظى بضيافة كاتب مميز

تحياتي

kAiKa-MGroMa يقول...

looooool

امبيه لا كلش مو خوش دقه :\

امبيه لا ما اتخيل تصير فيني

لا يكون مسافر بروحك بعد؟

امبيه امبيه 7 ساعات مو شويه

وبالطياره اللي ريحتها تلوع الجبد

انا اقول بعد انه شكلها سنه مليقه

الله يستر

:\.

@alhaidar يقول...

Ni3na3ah :

happy new year 2 sis :)

wallah 7adha mzajha 3aly elmothefa :))

allah ysalmech ..

mrorech as3adney :)

@alhaidar يقول...

محمد سعيد القويري :

حياك الله اخوي العزيز ..

وما تقصر طال عمرك أهل المملكة معروفين بكرمهم وضيافتهم ..

بس حنا ما نزلنا من الطيارة بقينا فيها لي الظهر :))

وحتى ما ودونا دبي ولا البحرين اللي مشوارها عشر دقايق .. راحو للدمام طريج نص ساعة .. يعني باقي ربع ساعة ونرد الكويت تخيل :)))

ومثل ما تفضلت .. الحمد لله المور مرت سليمة :)

يسعدني دائما تواصلك أخي ..

@alhaidar يقول...

KAIKA-MAGROMA :

اهلين اخيتي .. والله فعلا كلش مو خوش دقة وخصوصا ببداية السنة :)

ورايح مع العايلة مثل ما اهو واضح بالموضوع بس ماكو فايدة ;)

والسنة اللي هذي اولها الله يستر أكيد بتكون مليقة :))


اسعدني مرورج الكربم ..

|:| DUBAI |:| يقول...

كان نزلتوا عيل دبي
تشربون شاي بالنعناع
: )
و نعزمكم على جباب و جامي
و بلاليط و لقيمات ..

ما استوت قطر ..أمريكا!!
: )

نحن في طيرانا لو تتأخر ساعتين
نطفش .. و نمد البوز ..

وين 7 ساعات ..أي امريكا ..لندن لندن خخخخ!!

بس سنة حلوة كانت عليك من أولها !!

---------

تشرفت بالمرور هنا !!

@alhaidar يقول...

DuBAi :

والله يخوي استوت ضرابة وانت الصاج :))

ذلونا بهالرحلة .. عين ما صلت على النبي ;p

جان زين نزلنا .. حتى بالدمام ضلينا بالطيارة ما نزلونا :)

وما تقصرون يا اهل الإمارات على راسي .. وإنشالله لنا زيارة قريبة حق مدهش ;)

مرورك جدا أسعدني وشرف لي :)

Sweet Revenge يقول...

الحمد الله علي السلامة
كوثرالله يحفظها اطلعت اشطر وحدة فيكم

fawwaz يقول...

اخ احمد

انا متابع تعليقاتك في المدونات

اسلوبك جدا راقي بالحوار و ثقافتك واضح انها عالية و اعتقدان وايد منهم مو كفو انك تعاملهم بهذا الرقي
لأن الكثير منهم ردودهم عليك كانت جدا استفزازية و حقيرة

يا ريتك حطيت لك اسم مستعار مثل ما نصحتك بالبداية

فمان الله

غير معرف يقول...

صباح الورد
ههه ضحكتني اخ أحمد اسمع سالفتي واحمد ربك بكرة وعشيا :

انا العام راده من بريطانيا على القطريه وانزل ترانزت قطر ومن قطر ارجع الكويت -ادري حوسه وعلى قولة اخوي رحلاتي على غرار:وين اذنك ياحجا بس طبعا كل هذا يهون في سبيل العلم واتباع سياسة التوفير ههههه :) -المهم نزلت قطر ولا يقولون منو رايح كويت بسرعه "جلتي جلتي "وطفت الدور والمسافرين مستغربين انطلاقتي وشمعنه هذي البنت ماخذينها ومطوفينها هههه اخر شي اروح صوب الكاونتر ولا توهم مسكرين واترجا ودوني الكويت دخلوني بلييز اهلي بلمطار ناطرين عودتي على احر من نار جهنم وليس جمر ..
والحبايب قالولي ممنوع خلاس بابا ما يسير ..وطلعوا لي بوردنغ يديد وقعدوني بالمطار من المغرب لغاية طياره الساعه وحده بليل اطق اصبع ومطارهم صغيرون وكان زحمه حييل وانا كنت مفجوعه ميته يووووووع ومافي غير 3 مطاعم رايحه فيها يومها قمت الطم من اليوع والتعب ووفوق كل هذا القطريين بلمطار فاضيين يغازلون :(
تخيل انا كنت ارد من بريطانيا اولا اطلع من غرفتي امشي ثم اخذ باص ثم قطار ثم انزل محطه قطار اخرى ثم انزل المطار ثم امشي في ترمنال كبر الكويت ههههه حتى اصل للكاونتر ..تالي عاد اندقر بمطار قطر ..بس لي يومكم احب اطير على القطريه :)

غير معرف يقول...

نسيت اقولك المطاعم كان عليهم دور خباز ايراني في صباح شتاء باارد في بلد يقع في قارة افريقيا وشعبه يعاني الماجاعات .....
انا شفت الدور قمت ابجي على ماايي دوري خفت أكل روحي ههههههه

نوعي غريب قبل السفر وبلطياره ايضا ما اكل شي احب معدتي تكون فاضيه واكون خفيفه زي الريشه ..
عموما بعد هاالدرس القاسي قمت اشتري ككاو واخليه في شنطتي تحسبا للطواريء
وقمت اشرب كوفي واكل اي شي خفيف قبل لا اطير

المقوع الشرقي يقول...

ما صدق 7 ساعات
لو انا جان نزلت
مره قعدونا البرتيش 4 ساعات بهيثرو ما عبرت كلت قلبهم بالحنه
طول الرحله محاربيني
نضيف صفت الصبر وسعه البال
لرقي اخلاقك
هنيئا لك
تحياتى

@alhaidar يقول...

sweet reveng :

الله يسلمج أخيتي ..

ئي والله وانتي الصاجة لاعبتها صح ;p

أسعدني مرورك :)

@alhaidar يقول...

fawwaz :

بداية شرف كبير لي أخوي إن تتابع ردودي ومدونتي وهالشي تاج على راسي :)

الشغلة الثانية أنا لازلت مو ندمان على وضع اسمي الحقيقي .. ما عندي شي أخشه طال عمرك .. وصدقني حتى لو كنت حاط اسم مستعار فما كانت ردودي راح تتغير :)

مدحك لخلاقي يحرجني وقعد تعطيني أكثر مما استحق طال عمرك .. وما تقصر :)

وفاهمك عدل على موضوع الردود ومثلك عارف الكل يقدر يتكلم بنفس أسلوبه الاستهزائي وكلماته السوقية .. أسهل شي .. لكن مثل ما تفضلت أخلاقي ما تسمح .. وخل كل إناء بما فيه ينضح :)

ما تقصر على النصايح أخوي وزيارتك جدا أسعدتني .. اتمنى تكرارها :)

@alhaidar يقول...

الأخت غير معرف :

ويييييه هذي سالفتج " أجيد " من سالفتي :))

الله يعينج والله ..

ومطار الدوحة الحالي فعلا تعيس ..

بس أبشرج بيفتحون مطار يديد بعد سنتين يقولج مسوينه اميييية طبقة ;p

والقطرية فعلا طيارة محترمة كافي أفلامهم تنزل قبل الشوتايم والسينما عندنا ;p

أسعدني مرورج الكريم أختي :)

@alhaidar يقول...

ALMAQWA3 ALSHARGY :

يخوي مقعدينك بهيثرو مو عاجبك .. لو مطار سيريلانكا مثل رحلتي لأولى لماليزيا قبل 3 سنوات جان شسويت ؟ ;P

عموما مرورك أسعدني وكلامك تاج على راسي .. ما تقصر أخوي :)

غير معرف يقول...

ياخوي انا رحت العراق عشان اشرف على عقد خاص بالشركة الي اشتغل فيها
تصدق يومين نايمين في مطار بغداد ننطر طيارة تودينا دبي :(

@alhaidar يقول...

غير معرف :

والله أخوي لو أشتغل مدير الشركة ما أروح العراق .. من صجك رايح ؟ المفروض يعطونك معاش عشرتعش ألف على شجاعتك بس :))


أبي عينكم شلون غفت بالمطار ؟ الله يعينكم والله ..

والمهم الحمد لله على السلامة ..

مرورك أسعدني :)

المقوع الشرقي يقول...

مو ياليت احنا بالمطار
الا قاعدين بالطياره
ننطر 4ساعات
انحشرنا

BlogLess يقول...

أحمد

ألف الحمدلله على سلامتك

Pure يقول...

ههههه غشيت ضحك لما قلتلهم انك تبي تغسل الصحون p: و حلات كوثر عسى ما تعسرت هناك مسكينة ..

و عادي معلش أخوي أحمد هاذي وحده من اكشنات الحياة p:

و اقولك happy new year بكل براءة p: ما عليك من المضيفة يوم قالتلكم بكل وقاحة P:

و الحمدلله على سلامتكم اخوي و موفق :)

Unknown يقول...

ما عليك سوى ان تدونها في عالم الذكريات.....

اما ما يسمى المليفي ......افضل شيء لا تعليق

غير معرف يقول...

السلام عليكم ورحمة الله وبركاته
لاجديد ..

الطيران دايم آكششن ومعاناه ..

مايرتاحون اذا مايزروعونك بالمطار

او بالطياره

الله يعين بس

اما بالنسبه للآستجوابات والله مانب داريه عنهـا الخبر عندكم يالكويت *_*

سعيده بمروري هنـا

@alhaidar يقول...

almaqwa3 alsharqy :

وييييه 4 ساعات بالطيارة ؟؟


اعتقد حسيت بشعورج اخيتي :)

@alhaidar يقول...

BlogLess :

الله يسلمج أخيتي ..

شكرا على المرور ..

@alhaidar يقول...

pure :

ئي والله أخيتي وحدة من أكشنات الحياة .. شنسوي بعد :)

كوثر تعسر ما تتعسر الله يطول عمرها :))

بس من الزهقة نسينا البس اس بي مالتها بالطيارة .. شيفكنا عاد ؟ :)

هابي نيو يير تو أخيتي .. مصفي النية لا تخافين ;p


والله يسلمج من كل شر انشالله ..

اسعدني مرورج الكريم .. :)

@alhaidar يقول...

الطائر الحر :

وانت صاج يخوي ..

أسعدني مرورك الجميل :)

@alhaidar يقول...

M!ss fo0fo0 :

وعليكم السلام ورحمة الله وبركاته :)

والله اخيتي صارت المعاناة في بعض الأوقات مثل الضرايب .. خصوصا إذا شاري التذكرة بسعر رخيص وقايل حق واحد من ربعك عينه حارة :)

والاستجوابات صارت عندنا يا طويلة العمر مثل الهم على القلب .. بمناسبة وبدون مناسبة :)

بـابـل يقول...

السجن مهما كان

لو كان بقصر ذهبي

أحسه قبر بكهربا


شكرا لك اخوى الغالي

وبس

بابل

@alhaidar يقول...

بابل :

وانت الصاج اخوي ..

ما أجمل الحرية ..

شكرا على مرورك الجميل :)

أتيت متاخرة يقول...

وبالله ليش ما نزلتوا بالبحرين عندنا أدون من الدمام

وبالمرة تاكل حلوى ومتاي

تعيش وما تاخذ غيرها يا رب

|:| DUBAI |:| يقول...

أختي أنا

>_<

و انتوا بعد على الراس ..

بلادنا تشوق "ع قولتكم" في الشتاء
مب في الصيف ..

يبالكم لفة في القرية العالمية

حياكم والله !!

@alhaidar يقول...

أتت متأخرة :

والله أخيتي أنا قلت حق الكابتن بس للأسف طلع عيونه شقر يعني ما يعرف بنجلاديشي ;p

عاد يا زين البحرين وحلوى البحرين واهل البحرين والله ..ئي ولا أنسى العبي بسوق المحرق ;p على راسي :)

مرورك أسعدني .. جزيل الشكر :)

@alhaidar يقول...

dubai :

آسف أختي .. إنتي مثل الشمس الاسم مذكر بس اهي أنثى :)

ودبي دار الحي حلوة بالصيف والشتا .. المهرجان اللي طاف كنت هناك ..

وأروع مكان استخفت فيه بنتي القرية العالمية .. خصوصا لما شافت لالا من عيال تلتبيز :)))

مرورك الكريم أسعدني أخيتي :)

غير معرف يقول...

حمدلله على السلامة ..
(كل تأخيرة فيها خيره):)
أشكر لك زيارتك لمدونتي
مما جعلني أكون هنا ..
بين أركان الكلمات الراقية ..
دمت بخير

@alhaidar يقول...

ذكرى الجروح :

الله يسلمكم من كل شر ..

أتشرف بزيارتكم لي وزيارتي لكم ..

دمتم بخير :)

a7mad Nabeel يقول...

السلام عليكم
الاستاذ الاعلامي أحمد الحيدر
هذه أول زيارة لي لمدونتك و أتشرف بهذه الزيارة
بصراحة الهدف من زيارتي هذي اوجهلك التحية على ردك بموضوع سماحة السيد حسن نصرالله ببلوج عمتي و اللي عجبني و خلاني اشوف الكثير من الخبايا في عالم التدوين
و اللي انكشفلي بعد ما انطرح هذا الموضوع مدى سطحية البعض من المدونين
هذا من جهة
و من جهة أخرى اكتشفت وجود حقد لا اعرف ان كان طائفيا بالاساس او لا على سماحة السيد حسن حفظه الله
تحياتي لك و لقلمك الراقي
:)

@alhaidar يقول...

A7mad nabeel :

وعليكم السلام ورحمة الله وبركاته ..

يشرفني تزورني طال عمرك أول مرة وإنشالله ما تكون الأخيرة :)

بالنسبة للموضوع اللي تفضلت فيه فالسيد حسن الله يحفظه وغيره بالنهاية من البشر .. قد يصيبون وقد يخطئون .. ولكن عندي مبدأ عام أن الخطأ على الأشخاص أنفسهم وشتمتهم والاستهزاء بهم لا يجوز .. سواء كان السيد حسن أو بن باز أو غيرهما ..

أما سطحية بعض الأخوة المدونين حسب ما تفضلت فلكل فكره وقناعاته ومستواه .. وما نقدر يخوي نتحكم بمستوى طرح الناس .. لكن ما يمنع نحاول نرتقي فيه من وجهة نظرنا المتواضعة ..


أما الحقد الطائفي فهو موجود لدى عدد من أبناء الطائفتين المسلمتين الكبر تجاه بعضهما بكل أسف .. شئنا بتقبل تلك الحقيقة أم أبينا وفضلنا وضع رؤوسنا في الرمال .. ولكن هذا لا يعني أن العقلاء عددهم قليل .. ولا يعني أيضا أن كل من ينتقد منطلقه طائفي ..


أسعدني مرورك الكريم أخوي وتشرفنا فيك :)

غير معرف يقول...

بصراحه موضوع التأخير وارد حتى بأكبر المطارات العالمية ,,
لكن الفرق انه يترك للركاب حريه النزول من الطائرة لحين الأقلاع ,,
لكن بأي حق نقارن !!!!!!

ع العموم ,,
الحمد لله على سلامتكم ,,
و اتمنى لكم رحلات أفضل في المستقبل ,,
و ليه لا لندن :)


تقبل مروري و اعجابي بطرحك ,,
و سعدت بزيارتك لمدونتي ,,
ستظل حروفك هناك فخر لي ,,
^^

@alhaidar يقول...

أسيرة اللوحة :

سعادتي أكبر برد الزيارة .. وعسى تبادل الزيارات لا ينقطع :)

بالفعل حريتنا في الاختيار كانت مفقودة تماما .. ما أشعرنا أننا في سجن كبير !


الله يسلمك .. ولا يبليكم بما ابتلانا من مغامرة مملة :)

مرورك زادني شرفا .. إلى الأمام دائما ..

The Doctor يقول...

الله يعين

بس هم احسن من الي صار في هابي نيو يير

في العالم

:)

@alhaidar يقول...

The doctor :

يعين الجميع ..

والله ما أظنتي :)))

تقبل تحياتي :)

التميز المثالي للخدمات المنزلية يقول...


شركة تنظيف بالدمام

شركة تنظيف منازل بالدمام

شركة تنظيف فلل بالدمام

شركة تنظيف شقق بالدمام

شركة تسليك مجارى بالدمام

شركة تنظيف منازل بالخبر

شركة تنظيف فلل بالخبر

شركة تنظيف شقق بالخبر

شركة تنظيف بالخبر

شركة تسليك مجارى بالخبر

شركة كشف تسربات المياه بالاحساء

شركة مكافحة حشرات بالدمام

omar ail يقول...


Your site is very helpful
http://antiinsects.iwopop.com/
http://antiinsects.mex.tl/
https://antiinsects.1msite.com/
http://7asobi.com/
https://www.prokr.net/ksa/jeddah-water-leaks-detection-isolate-companies/