الخميس، 25 ديسمبر 2008

هلوسة نهاية الأسبوع ( 2 )

بعد النجاح الخارق ومنقطع النظير الذي حققته هلوسة الأسبوع الماضي ( شرايكم بالبروباجندا ؟ ;p ) .. قررت ان اهلوس مجددا ( بعد مو مصدق لقى أحد يسمعه هههه ) .. ولكن هذا المرة الطابع الخليجي يغلب علي .. لا أدري لماذا .. ربما لاقتراب موعد البطولة ;)
___
على عكس الأسبوع الماضي الذي كان ختامه جميلا بعيد ميلاد درّتي الثمينة كوثر ، كان هذا الأسبوع " مليقا عسيرا حقيرا " منذ بدايته حتى نهايته ! ويكفي أن أقول أنها – كوثر – أصيبت بالتهاب وبقينا نذهب ونعود إلى مستشفى السلام حتى ظهر اليوم .. ونتمنى أن تكون الأزمة في مرحلة النهاية ! أتمنى أن اسبوعكم لم يكن مثلي .. لاسيما أنه لو كان فسينطبق علينا المثل " جيت اشتكيله لقيته يبجيني " .. اعتقد أن المثل من تأليفي ! ___ وبسبب مرض كوكو .. ألغيت السفرة التي كانت مقررة إلى قطر الشقيقة لحضور افتتاح معرض الكتاب الدولي هناك مع عدد من الزملاء كتّاب دايموند بوك " راحو عني وخلوني L " حيث موعد تحليلها اليوم يصادف نصف موعد السفر تماما ! ولكني سأعوضها نهاية الأسبوع المقبل وأحضر الختام وأزور الدوحة ( القطرية وليس الكويتية التي أسكن فيها ! ) لأول مرة بإذن الله . بالمناسبة .. العيد الوطني القطري يصادف ذات عيد ميلاد ابنتي المصونة .. فكل عام والشقيقة بخير .. وبصراحة قطر اليوم بفعل بن همام أقرب دولة إلينا ! فعل بن همام وليس فعل راعي حفل الحمام .. يا سلام ;p ___ على ذكر دول الخليج .. زرت قبل فترة مملكة البحرين الشقيقة ، وواجهت مع المدام هناك أمرا عجيبا غريبا أود أن أسال " البحارنة " عنه .. حيث استأجرت سيارة وكنت أقود في شوارعها بنفسي .. فلم أجد من يغضب مني أو " يلف علي ومو عاجبه " أو يقوم بحركات صبيانية وبهلوانية في الشارع .. أفكر جديا أن أستوقفهم لأسألهم عن ذلك وعن سر ارتفاع مستوى الأدب والتواضع بينهم .. لأني بصراحة شديدة لم أعتد على ذلك من معظم الكويتيين ! لولا الظروف وعشقي لوطني لقلت " حلفت يا الزينة ما أفارق البحرين .. في قلبي موضوعة ومحروسة وسط العين " .. ولكن تبقى البحرين والكويت دولة واحدة .. وإن تعددت الأسماء والمواصفات ! ___ في ذات السياق .. نترقب بلهفة مشاركة الأزيرق في كأس الخليج .. هذا الإنجاز الكبير الذي سيتحقق مع بداية العام . لا أدري هل أنا غبي أم أن البعض يستغبي .. بطولة فزنا فيها 9 مرات من أصل 18 .. أي نصف عدد البطولات مسجلة باسمنا .. كيف أصبحت مجرد المشاركة فيها إنجازا ؟ الله أعلم . آمل ممن يضعون ثقتهم المفرطة في اللاعبين ويحلمون بتحقيق البطولة أن " ينامو بكّير ويصحو بكّير " .. وإلا فإن " الطراق " الذي سيتلقونه سيكون عنيفا ! --- يحل علينا بعد أيام شهر محرم الحرام .. وهو شهر خير وبركة ورحمة بكل ما تحمله الكلمة من معنى لماذا ؟ ببساطة .. لأن الشيعة فيه وفي شقيقه صفر لا يقيمون الأفراح والأعراس .. وغالبا لا يذهبون إليها إلا إن كان صديقا مقربا ودون " فشحرة " . لماذا أفرح بذلك ؟ اسألوا أي متزوج ولديه ابنة مثلي عن السر في ذلك ليجيبكم !! أما أنا شخصيا ففرحي لأني قد أتمكن من توفير بضعة دنانير من راتبي .. أو على أقل تقدير لا تخسف ميزانيتي !! ___ آخر أخبار شهر فبراير الذي ننتظره كل عام لنشعر بان لدينا فرحة .. هو أن الحفلات الغنائية قد يكون دخولها مجاني لجذب أكبر عدد .. أو على الأقل باسعار معقولة .. ولا عجب في ذلك لأن الاعتماد في الدخل يكون على الرعاة والمعلنين .. الخبر ليس أكيدا حتى الآن .. وأنقله إليكم رغم انه لا يعنيني !! ___ إلى هنا انتهت هلوستي .. آملا ألا أكون صدعت رؤوسكم .. أيضا !

هناك 19 تعليقًا:

-mate يقول...

هلا بوشهاب،

الله يقوم كوثر بالسلامة ويحفظها ربي من كل سوء ويخليها لكم يارب
وكل عام وأنتم بخير
:)

بالنسبة لقيادة السيارة في البحرين، يا أخي والله صدقت. السياقة هني قمة في الرقي والتحضر

تلاقي عند التقاطع اللي بيكملون سيدة طابور شطوله واللي يمهم بلفون يسار ماكو إلا سيارتين ومع ذلك ماتشوف من يقل أدبه ويروح الحارة اللي مافيها أحد ويلف على الباجي

كذلك في الدوارات، الكل عارف طريجه. محد يلف على أحد. كلهم ينتظرونك ولا يطلعون عليك.

وكلما أرد الكويت أحس أن الحوش ما أكثرهم، يلفون عليك، يخطرون، يلوعون جبدك، يرفعون ضغطك

لاتقارن سواقتنا وسواقتهم

أما الحديث عن أمجاد الكويت مايشفعلك إذا بني يمن متعادليت وياك والكل طاقك أفا من كل مكان، حنا عيال اليوم والله يستر

مدونة جميلة تستحق المتابعة يابوشهاب

كبرياء وردة يقول...

الله بسلم لك كوكو ويحفظها
ما تشوف شر ان شاء الله

تروح وترد بالسلامة ان شاء الله

وووأخجلتني بمدحك للبحارنة
صدقت، احنا نعتبر ان انتوا واحنا واحد مافب فرق بينا
ومن كثر ما احب الكويت واهلها كل جم يوم اخذ نفسي واييكم

كل اللي هامك بمحرم التوفير:p

@alhaidar يقول...

mate :

هلا فيك اخوي ..

ئي والله صدقت ويبت الأمثلة بمحلها مية بالمية ..

لا وكلهم كوم واللي لما يشوفك مضيع اهو يوقفك ويقولك وين تبي تروح ويدليك يمشي جدامك ..

ياخي ليش اللي عندنا ما يتعلمون ويردون نفس ما قبل كنا جذي :(

وبالنسبة لليمن والله في اشاعة يقولون باخينهم بعد عشان نفوز عليهم بذيك الدورة ولا جان هم غلبونا .. الله اعلم بس على مستوانا النازل كل شي يجوز ..

وناطرين الأفا اليديد بعد جم يوم خلاص تعودنا .. :)

اسعدني مرورك الكريم :)

@alhaidar يقول...

كبرياء وردة :

فديت البحرين واهلها والله .. ماكو داعي للإحراج انتو اللي خجلتونا والله بطيبتكم ومحبتكم .. المسامحة لا :)

وانشالله يا رب تفوزون بكأس الخليج وتغلبون الكويت بالذات 4 صفر لأن فريقكم يستاهل ويهالنا .. قصدي فريقنا مو كفو !! :)

والكويت تنور فيكم حياكم الله بأي وقت ..

الله يسلمج من كل شر انشالله ..

ومحرم فيه وايد اشياء مهمة بس هالشي وايد مهم ;p

فريج سعود يقول...

سلامات لكوكو

ماتشوف شر

السر في مستوى الادب في شوارع البحرين انهم مو فاضيين مثلنا

فراوله يقول...

صباح الورد والجوري
الف سلامه لكوكو
وان شاء الله ماتشوف شر
آمين
والبحرين هاديه كثير مثل اهلها
وانا بالذات لمسة هالشي لمن كنت هناك
:)

Unknown يقول...

السلام عليكم

ما تشوف شر كوثر والله يقومها لك بالسلامه ويشافيها ...وسقانا الله واياكم من نهر الكوثر ان شاء الله ...

اما للمنامه واهلها الطيبين فبأختصار كل ما في الامر انهم يحترمون القانون المروري....

وبخصوص الازرق ما اقول الا الله يسامح اللي كان السبب.

مدونه جميلة جدا تقبل مروري ومشاركتي

غير معرف يقول...

حضور الافراح ما يكلف ياخوك الا اذا تفصل بدلة وكرفته جديدة لكل عرس :)

@alhaidar يقول...

فريج سعود :

الله يسلمك يخوي ..

والله اعتقد هذا جزء من السر .. والسر الأكبر إن اخلاقهم بكل شي أعلى ..

أسعدني مرورك :)

@alhaidar يقول...

فراولة :

صباح النور والنوير ..

الله يسلمج والشر ما اييج انشالله ..

البحرين فعلا هادية مثل اهلها .. ماشالله .. الله يديم عليهم النعمة ولا يغيرها ..

بس فيها مشكلة وحدة .. عندهم خوش سوق للعبي الواحد ما ياخذ مرته معاه هناك ;p

@alhaidar يقول...

الطائر الحر ..

وعليكم السلام ..

الله يسلمك حبيبي الشر ما اييك .. ويسقينا وياك من نهر الكوثر آمين :)

وفعلا مثل ما ذكرت أهل البحرين يحترمون القانون المروري .. لأنهم أصلا يحترمون أنفسهم ..

وبالنسبة للأزرق لا والله يخوي الله لا يسامح اللي كان السبب بهذلنا !!

مرورك أجمل ويسعدني تواصلك الدائم :)

@alhaidar يقول...

غير معرف :

يخوي بالنسبة لنا ما يكلف صح كلامك ..

بس مداماتنا ( يعني زوجاتنا ) شغلهم كله على أفانا ;p

وكل عرس يبيله ميزانية شهر :)

اسعدني مرورك :)

أبو لطيف يقول...

سلامات ...اجر وعافية

ما تشوف شر كوكو

ربي يشفيها ويعافيها

البحرين ... اسال عن القانون وتطبيقه

المنتخب... لا عزاء للرياضة

حفظك الله ورعاك

@alhaidar يقول...

أبو لطيف :

يا هلا وغلا فيك أخوي ..

الشر ما يجيك انشالله ما تقصر ..

البحرين يطبقون القانون فعلا .. لكن اعتقد ليس خوفا فقط بل احتراما للذات ..


وشبه المنتخب فعلا لا عزاء له ..

حافظك ربي وأسعدني مرورك :)

enter-q8 يقول...

ما تشوف شر الصغيرة
عاد اللحين حرص حيل بهالجو
تسال ليش مافي مثلنا بالحرين عادي
كل دولة و لها مميزاتها
هذي ميزه عندنا ترى
بس انت مو مثبت

مركبنا يقول...

السلام ،،

سلامتها كوثر وماتشوف شر ان شاء الله ،،
والعمر كله ان شاء الله ،،

وشكرا فقلد اضفت لنا كتاب ومثل الله اكبر ،،
واعتقد اسبوعك قد شاطرك يه جم غفير من الكويتيين ،،

ماشاء الله جنك جمعت الخليج كله بدولة وحدة ،، حلوة نظرتك الايجابي والله محتاجنها وايد على قولتهم نظرته النحله ،،، وفقت

اي والله قهر نصها لنا ونقول وفرحانين ان بنشارك
باجر بيحطونا نقص التذاكر وهم بنفرح بعد ،،،
الله يستر من هل الانجازات الي ماتودي الا لي وراء


اما عن فبراير متاكدة انه سيكون غير لان حاله حال ( زين ) راح ينزل مهرجان الوطن معاه ( ماادري ليش زحمة خلصت الشهور)
وهذا يعني ان المنافسه راح تشتغل عدل ،،،

@alhaidar يقول...

Enter-Q8 :

ئي والله يخوي اللجو ذبحنا مرة برد مرة دفا .. مو بعيد بعد يومين غبار ;p

ممممممممم ما فهمت شلون ميزة عندنا ؟؟ جان زين توضحلي وانا اخوك :)

يسعدني تواصلك الدائم :)

@alhaidar يقول...

مركبنا :

وعليكم السلام ..

الله يسلمج اخيتي الشر ما اييج انشالله .. والعمر كله لكم :)

العفو والإضافة واجبنا حتى لا نكون مجرد ناقلين في المجتمع ;p

وأتمنى يكون كل الكويتيين أسابيعهم أفضل مني .. لن بصراحة ما كان ذاك الزود :)

والخليج اخيتي كل دولة فيها ميزة والبحارنة صراحة اهم ميزة ديرتهم .. بطيبتهم ورفعة اخلاقهم .. نتمنى تعم الإيجابيات وتزول السلبيات ..

أما الكاس فالناس اللي مثلي ومثلج ينقهرون .. لكن للأسف في ناس مصلحتهم فوق كلشي والكويت آخر همهم .. عشان جذي صارت المشاركة فقط إنجاز !! :(


وفبراير ولو إني ما أحب الوطن بس زين سوو دشو على الخط بالنهاية مثل ما تفضلتي التنافس فيه فايدة لنا كجمهور .. وانشالله يصير مثل لما فيفا دشت السوق على قولتج :)

أسعدني جدا مرورك وأتمنى تكراره :)

http://almoallem.net يقول...

وفقك الله على المدونه وتستحق المتابعه ابو شهاب الوردة
عراقى محب للخليج
http://almoallem.net